သင့်လက်ထဲက လိမ္မော်ချိုလေး တစ်စိပ်

မိဘမဲ့ကျောင်းက ကြီးပြင်းလာခဲ့တဲ့ လူငယ်တစ်ယောက်က
တွေ့ကြုံခဲ့ရတဲ့ အတွေ့အကြုံကို ပြန်လည်မျှဝေခြင်းဖြစ်တယ်။

ကျွန်တော် ငယ်ငယ်လေးကတည်းက မိဘတွေ ဆုံးပါးသွားခဲ့လို့ ၉နှစ်သားအရွယ်မှာ
မိဘမဲ့ ကျောင်းတစ်ကျောင်းမှာ သွားနေခဲ့ရတယ်။ မိဘမဲ့ကျောင်းလို့သာ ဆိုတယ် ထောင်နဲ့မကွာလှဘူး။ နေ့အချိန်မှာ ကျွန်တော်တို့ ၁၄ နာရီလောက် အလုပ်လုပ်ရတယ်။
ပန်းခြံမှာ ပန်းတွေ စိုက်ပျိုးရတယ်။ မီးဖိုမှာ ကူရတယ်။ တစ်ခါတလေ လယ်တွေ ထွန်ယက်ရတယ်။

တစ်နှစ်ပတ်လုံးမှာ ကျွန်တော်တို့အတွက် နားရက်တစ်ရက်ပဲ ရှိတယ်။
အဲဒီနေ့က ခရစ်စမတ်နေ့ပဲ။ အဲဒီနေ့မှာ ခရစ်စမတ်လက်ဆောင်အဖြစ် လူတိုင်းက
လိမ္မော်သီး တစ်လုံးစီရကြတယ်။ ခရစ်စမတ်မှာ ကျွန်တော်တို့ အတွက် အစားအသောက်ကောင်းတွေ မရှိဘူး... ကစားစရာ အရုပ်မရှိဘူး...
ကျွန်တော်တို့ရဲ့ ဝေစုဟာ လိမ္မော်သီး တစ်လုံးပဲဖြစ်တယ်။

တစ်နှစ်ပတ်လုံး အမှား မကျူးလွန်တဲ့သူ၊ ပြောစကားကို နားထောင်ပြီး၊ လိမ္မာတဲ့သူမှ လိမ္မော်သီးကို ရတာဖြစ်တယ်။ ဒါကြောင့် ခရစ်စမတ်ရဲ့ လိမ္မော်သီးဟာ ကျွန်တော်တို့ တစ်နှစ်ပတ်လုံးရဲ့ မျှော်လင့်ချက် ဖြစ်ခဲ့ရတယ်။

ဒီလိုနဲ့ ...
ခရစ်စမတ် ပွဲတော်ရက် တစ်ရက်ရောက်လို့လာပြန်တယ်။ အဲဒီရက်က ကျွန်တော့်အတွက် ကမ္ဘာပျက်တဲ့ နေ့ပဲ.... ကလေးတွေ အားလုံး လိမ္မော်သီးရဖို့အတွက် ကျောင်းအုပ်ကြီးရှေ့ တန်းစီနေချိန်မှာ ကျွန်တော်က အခန်းရဲ့ ထောင့်တစ်နေရာမှာ ပြစ်ဒဏ်ပေးခံနေရတယ်။
ဘာဖြစ်လို့လဲဆိုတော့ အဲဒီနှစ် နွေတုန်းက ကျောင်းကနေ ထွက်ပြေးဖို့ ကြိုးစားခဲ့မိလို့ပဲ။

လိမ္မော်သီးရတဲ့ ကလေးတွေ ခြံထဲ ကစားခွင့်ရတဲ့ အချိန်မှာ ကျွန်တော်က အိပ်ခန်းထဲမှာ တစ်ယောက်ထဲ လဲလှောင်းနေရတယ်။ ကျွန်တော် အရမ်းဝမ်းနည်းတယ်၊ ရှက်လဲ ရှက်တယ်။ ရှိုတ်သံတွေကို မျိုသိပ်ရင်း ကျွန်တော် မျက်ရည်ကျတယ်။ ဒီလောကမှာ ကျွန်တော် အသက်ရှင်နေတာ ဘာအဓိပ္ပါယ်မှ မရှိခဲ့ဘူးလို့လဲခံစားရတယ်။

ခဏကြာတော့ အခန်းထဲကို ခြေသံတစ်ခု ၀င်လာတာ ကျွန်တော် ကြားရပြီး၊
ကျွန်တော့်ကိုယ်ကို လုံးထွေးပတ်ထားတဲ့ စောင်ကိုလည်း ဆွဲလှန်လိုက်ပါတယ်။
ကျွန်တော် မျက်စိကို ဖွင့်ကြည့်လိုက်တော့ ၀ီလီလို့ခေါ်တဲ့ ကောင်လေးတစ်ယောက်
ကုတင်ရှေ့မှာ ရပ်နေတာကို တွေ့ပါတယ်။ သူ့ ညာဖက်လက်မှာလည်း လိမ္မော်သီးတစ်လုံး ဆုပ်ကိုင် ထားပြီး၊ ကျွန်တော်ကို ကမ်းပေးနေတယ်။

သူ့ ဆီမှာ ဘယ်လိုလုပ်ပြီး လိမ္မော်သီး တစ်လုံးပိုနေရတာလဲ... ကျွန်တော်နားမလည်ပါ ... ၀ီလီကိုကြည့်လိုက်၊ လိမ္မော်သီး ကိုကြည့်လိုက်နဲ့ ကျွန်တော် ဇဝေဇဝါဖြစ်နေမိတယ်။

ဝီလီက လက်ကို ရှေ့တိုးပြီး ထပ်ကမ်းပေးပြန်တယ်။ အခွံနွှာထားတဲ့ လိမ္မော်သီးကို သေချာကြည့်တော့မှ အရာရာကို ကျွန်တော် သဘောပေါက်တော့တယ်။
ကျွန်တော် မျက်လုံးအိမ်မှာ မျက်ရည်တွေ ပြည့်လျှံလို့ လာပြန်တယ်။

ဝီလီကမ်းပေးလာတဲ့ လိမ္မော်သီးကို လက်နှစ်ဖက်နဲ့ ကျွန်တော် ယူလိုက်ပါတယ်။
လိမ္မော်သီး အမွှာ တစ်ခုဆီတိုင်းဟာ၊ ကလေးဆယ်ယောက်က တူတို့ ဝေစုရတဲ့
ဒီခရစ်စမတ်လိမ္မော်သီးကနေ တစ်မွှာဆီစုပြီး၊ ကျွန်တော်ကိုလည်း လိမ္မော်သီးတစ်လုံး ပိုင်ဆိုင်စေချင်တဲ့ ဆန္ဒနဲ့ လိမ္မော်သီး တစ်လုံးဖြစ်အောင် ပေါင်း လိုက်တာပဲဖြစ်တယ်။

ကျွန်တော့်ဘ၀မှာ ...
အဲဒီ လိမ္မော်သီးဟာ အချိုဆုံး၊ အကောင်းဆုံး ခရစ်စမတ်လက်ဆောင် ဖြစ်ခဲ့တယ်။
သူတို့ရဲ့ စာနာတတ်တဲ့ မေတ္တာကို ကျွန်တော်နွေးထွေးစွာခံစားလိုက်ရတယ်။

စာနာတတ်တဲ့ သူငယ်ချင်း မိတ်ဆွေဆိုတာ ဘ၀မှာ အဖိုးတန်တဲ့ အပေါင်းအဖော်တွေပါ။ တစ်ဦးတစ်ယောက် မတော်တဆ ပြောလိုက်မိတဲ့ စကားလေးတစ်ခွန်းနဲ့ အပြုအမှုအတွက်
သင် စိတ်ထိခိုက်နေသလား ... သင့်လက်ထဲက လိမ္မော်ချိုလေး တစ်စိပ်ကို မျှဝေလိုက်ပါ..... သင့်နှလုံးသားက ဖြေဆေးတစ်ခုပြန်ပေးပါလိမ့်မယ်.........

ရန်ကုန်မြို့မှာ မိဘမဲ့ကလေးထိန်းကျောင်း ၁၀၀ ကျော်နဲ့
မိဘမဲ့ခလေးပေါင်း ၁၅၀၀ ကျော်ရှိတာဖြစ်တယ်။ ၇၅% က ချင်းလူမျိုး
ကလေးသူငယ်များဖြစ်တယ် ....
ဒီအဖြစ်အပျက်မျိုးဟာ တစ်ကယ်ဖြစ်နေတာ၊ ဖြစ်ခဲ့တာရှိတယ်
အခုလည်းရှိတယ်၊ ကိုယ့်ပေါင်ကို လှန်ထောင်ရလို့ ရှက်မိပါတယ် ...

လူလူချင်း ကျေးဇူးကျွန်ပြုမှု၊ အသုံးချမှု ကင်းကြပါစေ ...

Credit : မုန်းခက်

ဤစာဖတ်သူများအားလုံးစိတ်ဓာတ်ခွန်အားတွေရရှိနိုင်ပါစေလို့ရွှေချစ်သူမှဆုတောင်းမေတ္တာပို့သပေးပါတယ်။

မျှဝေပေးခြင်းဟာလည်းမေတ္တာတစ်မျိုးပဲမို့မျှဝေပေးပါနော်...