မွေးမယ့်သူမရှိတဲ့ ကြောင်ကို အိမ်မှာခေါ်မွေးတဲ့အခါ ဒီအချက်လေးတွေ သိဖို့လိုအပ်တာ

 ကြောင်တွေဟာ အိမ်မှာမွေးဖို့ အသင့်တော်ဆုံး အိမ်မွေးတိရိစ္ဆာန်အမျိုးအစားထဲက တစ်မျိုးပါပဲ။ ဒါပေမယ့် ကြောင်မွေးတော့မယ်ဆိုရင် သိထားသင့်တဲ့ အချက်တွေ ရှိနေပါတယ်။ အထူးသဖြင့် လမ်းပေါ်မှာ တွေ့တွေ့နေရတဲ့ ကြောင်လေး၊ အိမ်နားမှာ ခွေခွေနေတဲ့ ကြောင်လေး၊ ပိုင်ရှင်မရှိတဲ့ ကြောင်ကို အိမ်မှာခေါ်ယူမွေးတော့မယ်ဆိုရင်တော့ သင့်အနေနဲ့ ဒီအချက်တွေ လုပ်ဆောင်ပေးဖို့ လိုအပ်လှပါတယ်။

၁။သူ့ကို တိရိစ္ဆာန်ဆေးခန်း အရင်ဆုံး ခေါ်သွားပါ။
ပြန်ဖို့ အိမ်မရှိတဲ့၊ ကျွေးမွေးမယ့်သူမရှိတဲ့ ကြောင်လေးကို မွေးတော့မယ်ဆိုရင် ပထမဆုံး တိရိစ္ဆာန်ဆေးပေးခန်းမှာ အရင်ဆုံး သူရောဂါရှိမရှိ စစ်ဆေးဖို့ လိုအပ်ပါတယ်။ သူ့မှာ ဘာရောဂါမှ မရှိဘူးဆိုရင် သင်အိမ်မှာမွေးဖို့ကိစ္စ ဆက်လုပ်လို့ရပါပြီ။

၂။သူ့အတွက် နေရာထိုင်ခင်းလေး ပထမဆုံး သေချာစီစဉ်ပေးပါ။
ပထမဆုံးအနေနဲ့ အိမ်သားတွေ အားလုံးနဲ့ ရောရောထွေးထွေး မထားပါနဲ့ဦး။ ပထမဆုံးလုပ်ရမှာက သင်က သူ့အတွက်စားသောက်စရာ၊ သူ့ကိုဘယ်နေရာမှာ ထားမလဲဆိုတာနဲ့ သောက်ရေ စတာတွေ အားလုံးကို စီစဉ်ပေးရမှာပါ။ လောလောဆယ် ကြောင်စာကို ဘာကျွေးရမှန်း မသိရင် အပြင်မှာ အလွယ်တကူ ၀ယ်လို့ရတဲ့ ကြောင်စာထုပ်လေးတွေ ၀ယ်ကျွေးပါ။

၃။သီးသီးသန့်သန့်လေး ထားပေးပါ။
ပထမ ရက်သတ္တပတ်အတွင်းတော့ သူ့ကို အခန်းထဲမှာပဲ သေချာထားထားပါ။ အစာကျွေးတာမျိုးအတွက် ကိုယ်တိုင်လာထည့်ကျွေးတာ၊ စကားပြောတာမျိုးတွေ လုပ်ပေးလိုက်ပါ။ ဒီအိမ်ဟာ သူ့အတွက် လုံခြုံတယ်ဆိုတာ သူသိသွားအောင် လုပ်ပေးပါ။ သင့်အိမ်မှာ အခြားအိမ်မွေးတိရစ္ဆာန်တွေ ရှိသေးတယ်ဆိုရင် ခုချက်ချင်း မျက်နှာချင်းဆိုင်ခိုင်းတာမျိုးတွေ မလုပ်ပါနဲ့။

၎။အရုပ်လေးတွေနဲ့ ကစားပေးပါ။
ကြောင်တွေဟာ ကစားရတာ နှစ်ခြိုက်ပါတယ်။ သင့်မှာ ကြွက်ရုပ်လေးတွေ ရှိတယ်ဆိုရင် သူတို့နဲ့ ပေးဆော့လိုက်ပါ။ မရှိဘူးဆိုရင်လည်း အခြားအရုပ်တွေနဲ့ သူတို့အပျင်းပြေအောင် ပေးဆော့ထားလိုက်ပါ။  ကြိုးလေးတွေ၊ အ၀တ်စ စတာတွေနဲ့ ကစားရတာလည်း သူတို့နှစ်ခြိုက်ပါတယ်။ ဒီလိုဆို အခန်းထဲမှာ ကုတ်နေရတာမျိုး သူမဖြစ်တော့ပဲ စိတ်ရော၊ ကိုယ်ပါ ကျန်းမာလာပါလိမ့်မယ်။

၅။သင့်ကို သူခင်မင်သွားအောင် စတင်လုပ်ဆောင်ပါ။
ဒီအချိန်ဟာ သူနဲ့သင့်ကြားက ဆက်ဆံရေးတစ်ခုကို ဖန်တီးရတော့မယ့် အချိန်ပါပဲ။ ဒီတော့ သူနဲ့ စကားပြောတာ၊ ဆော့ပေးတာမျိုးတွေ လုပ်ပေးရင်း သူနဲ့ ဆက်သွယ်မှုတစ်ခုကို ဖန်တီးပါ။  ဒါ့အပြင် သူ့အပေါ် သင့်ရဲ့ဂရုစိုက်မှု၊ ချစ်ခင်မှုတွေ ပြသပေးပါ။

၆။သင့်ဆီကို သူရောက်လာဖို့ ဖန်တီးပါ။
ရှေ့ရက်တွေမှာ သင်က သူ့ဆီကို အမြဲသွားပြီး သူ့ကို ဂရုစိုက်ပေးခဲ့ပြီးပါပြီ။ ဒီတစ်ခါ သူ့ကို ကိုယ့်ဆီလာအောင် ကြိုးစားပါ။ သူတို့ဟာ အသိစိတ်ကောင်းကောင်းရှိပါတယ်။ အာရုံခံလည်း ကောင်းပါတယ်။ ဒီတော့ အတင်းကြီး ကိုယ်နဲ့ အိပ်စားနေလို့ ကိုယ့်ဆီလာတာမျိုးထက် သူ့အပေါ် သင်ထိန်းကျောင်းနိုင်စွမ်းကောင်းလို့၊ သင့်ရဲ့ချစ်ခြင်းမေတ္တာကို သူခံစားမိလို့ သင့်ဆီသူလာတာမျိုး ဖြစ်ပါစေ။

၇။သင့်ရဲ့အိမ်ဘယ်နေရာ ဘယ်လိုဆိုတာ သူ့ကိုမိတ်ဆက်ပေးလိုက်ပါတော့။
ကဲ ဒါကတော့ ကြောင်တွေ သဘောအကျဆုံးအချက်ပါ။ သူတို့ဟာ အိမ်တစ်အိမ်မှာ ဘယ်နေရာမှာ ဘယ်ရှိတယ်ဆိုတာ စူးစမ်းတတ်ကြပါတယ်။ ဒီတော့ သင့်အိမ်ရဲ့ ဘယ်နေရာမှာ ဘာရှိတယ်ဆိုတာ သူ့ကို ပြသပေးလိုက်ပါ။ ဒါ့အပြင် သင့်ရဲ့အခြားမွေးထားတဲ့ တိရိစ္ဆာန်တွေနဲ့လည်း မိတ်ဆက်ပေးလိုက်ပါ။ အချင်းချင်း ရန်လိုတာမျိုးတွေ မဖြစ်အောင်တော့ သင့်ဘက်က ဂရုစိုက်ရမှာဖြစ်ပါတယ်။

 Credit : Trend Myanmar

 ဤစာဖတ်သူများအားလုံးကျန်းမာချမ်းသာကြပါစေလို့ရွှေချစ်သူမှဆုတောင်းမေတ္တာပို့သပေးပါတယ်။

မျှဝေပေးခြင်းဟာလည်းမေတ္တာတစ်မျိုးပဲမို့ မျှဝေပေးပါနော်...